Awacic nete tipiskaw pisimok

Peikwaw nehirowisiw e kice iriniwitc, Niaskonowetc kirika otiskwema Wapanokwe, wiranicikewaw e taciketcik pikokanik notcimik.  Niaskonowetc e ickwa mowisotcik, erot petamowakopan kekociciriw.  Nokikapowiwakopan wewerita e n’totakik taci e tetawwetakonik, natawapamewakopan kaie miskawewakopan awacica tikinakanik e matcikopisoritci wiricike pecotcik mictikok.  Kaskina wiec aitapikopan e wi miskawatc airiwa ka ki onihatc nehi awaca.  Micta arwactinikopan kaie nama awiriwa miskawekopan, iteritamakopan, ni ka kiweraw, okoma e nta miratc Wapanokwe, aci tca micta mireritamowakopan aci e taritci awaca ke sakihatcik. Etci tca ki icinikatawakopan Etci, notcimik taci micikitikopan, ki kackitaw notcimik kitci matisitc.  Opikokaniwaw pecotcik sakihikanik acterikopan, Niaskonowetc tca, mitcetwaw otcihakopan nahwe kice iriniw aka kitci nasiperitci.  Wetci aric, e koctamokopanen kitci pakopepariritci sakihikanik, kitci tca kwapaweritci. 

 

Peikwaw e otakocinik mekwatc onikihikwa e niparitci, Etci iteritamokopan, « ni ka nta pamotan orowitimik », pemantcic sakihikanik iti icakopan, micta mirwaciniw, mia wiec Etci nicto piponesikopan, nit iteriten.  Micta kicikacterikopan, mictahi, irin masinapeciniriwa pisimwa.  Wacikan tca takonikopan mia tiripan e icinakonik e arakickapekisitc.  Tpiskaw pisimw tca naha, kanawapamitiso sakihikanik tapickotc wamowinik.  Nama pakisamakopan Etci, sakihikan takonikopan kaie tca nihweriw e notamarik mia tewehikan ka coriawok kaie tiripan wacikan.  Peikw tiripana nete paskiparirikopan.  Etci iteritamokopan : « Kecpin ki nta matcikopatak anahwe ka paskickatc, kata micta mirwacinopan », matcakopan pemantcic mocak tca nikanik e wapamatc tiripana.  Kaie tca tiripanik motekopan.  Matcakopan, matcakopan mia sa e wecipapatak e iteritamokopanen epitc mirwacinik ka wapatak kaie erotc kiskeritam micta icpimik e aitatc kaie nac nete tipiskaw pisimok.

​

Ki tca miskowew irinica nete pisimok, aniki irinicak micta mireritamowakopan e wapamatcik Etci, aric pitoc e icininakosiritci.  Ki metowewok kaie ki tetipacimowok.  Nanake, aric ni apitc aci kicikarikopan, nama tca ki nitatowikopan Etci, ki tca petakopan kitci tipiskarik, tipiskaw pisimwa minawatc kitci nokositc sakihikanik pecotcic omikiwamik.  Ekotca ni ka nitatowitc e nta witamowatc onikihikwa kaskina ka ici wapatak.  Kaie ki wicamakopan onikihikwa e tipiskarik kitci wapamaritci okwimesa.  Micta mireritamowakopan aniki kice iriniwok e wapamatcik irinica kaie aka wiskatc wiricike aci kitci taciketc.  Pwacta minawatc, ki pe nitatowiw e pe kiwotamowatc otatama opikokanimirik, aci tca ki niporikopan nehi kice iriniwa.  Pecotcic e nanipowitc otatamik, papikweriri kopan, Etci iteritamokopan : « Nama ni ka otci ospehaw, wesa mirokwamiw».

Etci atisokan, aci micta mitceto pipona esko takok.  Aska e tipiskak kecpin e micta kicikactek, mia e wapamokw awacic, Etci na ka papihatc e niparitci nitc.

​

​

Texte : Alanis Obomsawin
Source : © Office national du film du Canada, 2010
                Tous droits réservés