Notcimik - Mictikok ota ka tatcik
Kicik
Kickacitc ote otinakiniwiw notcimik pecotcic ka ici mitciwok cipicic kekotc pwactikw. Awik e micta octotak kekotc awik ka opirikotc ntokohiko anihi kicka. Arimatc akopiso ote otasnakek kekotc oranik, opwamik, omistak. E ici cikopiwitc pikickohakiniwiw pikiwanicik tca arakaniwiw nama micta kinec ki akopisonaniwon ickwaso meka awik kinec e akopisotc. Mictahi mirotamo awik eckwa akopisotc ote otesnakek. Minawatc mina awik e micta akosapitetc anihi kicki pikiwana arew ite e ici wapapitetc aric mictahi wiskaskisoko kirowe aric wipatc acte akosapitew.
Irinatikw
Mictikw ka pinaskitc e takwakik. Mictikw ka nipiciwitc, ka otcikowihakaniwitc. Ekote e irapitisitc e miroskamik, irinatakowapo osikatew nac pikisikan, minawa naminas. Kiapatc kinowec kicisikatew, e ocitakaniwok pikotinikan. Micta mirowacin nehe, sisipaskot.
Wikwasatikw
Mictikw ka wikwasiwitc. Enkoweriw ka mowatc wapoc kewir, e apiciciritci, wikwasatikoca. E nipik kaie e takwakik maninikatew wikwas. Kinowaskosiw kaie wapekisiw anaha mictikw ka nipiciwitc. Wikwasatikw icinikatakiniwiw osam wikwasiriw e micta miro apatanik. Wikwamotai matci kaie tciman ocitakaniwon kecpin e otamirowakaniwok wikwas. Kitci ki mirocik ka wectakaniwok matci tesinikaniwon ekotca e ici masinawatahikaniwok.
Winkis
Mictikw ka wikwasiwitc napitc ka ocowecicitc. Micta kisokatatikosiw, irapitcitcikana otci ocitakaniwon kaie takoniw sakatakaniriw otcek ite itekera. Mackikiwon nehe, matci kaie ickote e kinoweritcikatek. Enko naha kotak mictikw ka miro apitisitc matci e asamikaniwok matci kaie e kotowokaniwok. Ote ici nitwakiw ka ici icpatanarik kaie tariwa kotakihi wikwasatikwa waska. Sakatakaniriw opime nte acteriw.
Sesekatikw
Mictikw ka cikopiwitc ka mirwapatisitc e anaskaniwonik. Micta mirowapitaniw pikiriw e wectakakniwoki irapitcitcikana matci kaie wikwas tciman.
Sesekatikwaskweaw itaniwon kecpin e micta mitcetitcik.
Cikokw
Mictikw ka mawotci kinowaskositc, ka micikititc. Cikopi askik ka pamapikecik cikopi e ici aripetinarik kirowe nte e ici micta sitaskwearik. Otapi osowakaniwiw matci kaie misiwe anaha mictikw apatisiw ekotca e ici osikatek kicakimite ekotca e ici akopisotc awik nite otasinakek.
Akimaskw
Mictikw mitowi winikis ka icinakositc ka tca mackikiwitc kecpin pitc orakeskok e pa pacakihikatek, matci awik e micta aieskositc kekotc awik e kiciniteritak minikwew aniheriw. Iskwew e nokickamakanik mekwatc otakosiwin peikon kaie ickwecic aka nac e akositc otakosiwin, minahakaniwiw tca.
