Notcimik - Mictikok ota ka tatcik
Akimask (ka mikatesitc)
Nte e ici matanak ici nitawakiw anohwe akimaskw Matci rareiakw cipicik tcimaso. Kicakamitek tca pemacic osikatew nac e iti itakamik kekat e osawakamik. Iskwew e nokickamakanik mekwatc otakosiwin peikon kaie ickwecic aka nac e akositc otakosiwin minahakaniwiw.
Asati
Mictikw ka micta kinowaskositc nac e iti pasotc kecpin e iti micta kiceatisitc kirika tca ocawackwariw orakeskw acitc micta mitceniw otikona. Otapi tca osowakaniwiw nac e iti pikiwotek ekotca e ici cicopekanakaniwitc awik ka ici akositc.
Mickekwatikw
Notcimik e ici wackekarik ici nitawokin anihe mackikiatikw aric cikiopik ka icinakositc. Wir tipirowe tepirak onitaw onipicim kecpin e ickwa takwakinik kirika pitoc iti icinakosiw ketca e mekwa nipinik. Awik e micta otakikomitc kaie e micta aspinikotc octotak, tepirak pemacic osikatew anihe mackikiatikw ote onoskwatikw ka akokerik otikona ekotca e ici sisikapatinikatek
Irinacit
Cikopi aka ka micta kawisitc kirika nipira ka kinikositc kaie ka taritci pikiwa papaskiw ka icinkasortci. Napitc micta sokimakosiw kirika pitoc icinakoniw otikon kaie tca kotak cikopi. Enko ka micta kictapitisitc e ocihakaniwitc nipakitok e manikanikw.
Atosipiatikw
Ite e ici mitciwok cipica nitawikino anihi mackikiatikwa. Tepirak kackackahikatew orakeskok ekotca e ici akotitakaniwok kicakamitek wec niarano tipahikanicic kekotc petakaniwon kitci iti atitek. Mocak ki apatan anihe orakeskw kecpin e atisikatek pakekineskisin kekotc pakekino wikasia.
Cikokw
Enko cikopi ka icinikasotc. Enko ka apitisitc e wectcikakaniwok e nipaiamihananiwok. Kirika enko ka apitisitc e anaskaniwokw rikasimonik e kapecinaniwok. Kaskina e aistakoki apitcihakaniw kecpin e kipecinaniwok notcimik. Kicisowakaniwon kirika.
​
Mictikw ka otceckwetcociwitc,
mictikw matci ka anaskewakaniwok.
Askiwacit
Mitowi cikopi anaha icinakosiw. tepirak motcik ici nitawikiw,nama kinowaskosiw. Ki miro apitisiw Nehirowisiwok otci.
