Ite kaki pe otci takok « Ickote » nictam
​
Aci weckatc owe kaki pe isparik, nama taw awik kitci ki miro mikawitc, tan apitc, tan ite, ka otci pe isparik. Aric ma, ki kanaweritcikatew kaki pe itetcik weckatc iriniwok. E ki anoskowi atisokotatotcik kaskina tcipatcimowiniw.
​
Ani apitc, micta kanaskosiwakopan iriniwok. E matanarik tacikewakopan, kirowe ko icpatanakopan kaie tca onotc ka otci icpatanaki matanawa. Mitcet ko nasipewakopan (mamik e icatcik), aric nama kotikoniwakopan. Kekwan wetci totamowakopanen ?
​
Nama awik ki otci kiskeritam kekwariw wetci totamowakopanen. Osam meka aci weckatc esko ki isparinokopanen owe.
​
Ani aric apitc, miro nokosikopan pisimw, nama aric tipi kicaskikekopan kitci ki kicowarik ota askik. Arimatc tca micta aitcihowakopan iriniwok ani apitc, awesisiwana e wikasimitcik. Ani e itikitiwakopan, misawatc apita ka itikititc iriniw, arimatc 30 kekotc 40 maskowana kitci ki miro tipiparitcik ke wikasimitcik.
​
Kecpin ko e onimiskiskakopanen, mictai ko koctatci kicikakopan. Iriniwok, awesisak, kasowakopan, wawatc pisimw, tarasak. E icinakonokopanen tca kaie, kecpin ko e kimiwonokopanen micta ko copectekopan nipi ka pakitik. Aric ma kaie, mictikok peikon e nitawkitcik, misawatc aka e kicowarik, micta ko mirokiwakopan, e micta mirositcik. Nama aric kiskeritakon tan e ici mictikowiwaspan.
Peikwaw tca minawatc e ki micta onimiskiskakopanen, aniki iriniwok, mekwatc e kasotakik matanak e pokonewarik, takonikopan meka taci ke icatcik mekwatc ani e wetci matci icikicikarik, wapatamowakopan ickoteriw, pisimok wetci pe matcekorerik matanak tca neta e ici takocikoreparinik. Tecikotc kiskeritamok e micta kicitamterik, nac, nama kinec, e ickwa onimiskiskarik. Tecikotc meka pisimw iti nokosikopan, ekotca ni apitc ka iti miro kicowak ota askik.
​
Aniki tca iriniwok, tato kaki wapatamowakopanen aniheriw ickoteriw, tecikotc matcawakopan, e tca kotci nta nantowapatakik neta pecotci matanak aniheriw ickoteriw. Nama tca ki otci miskamowakopan, atita tca ki pekiwewakopan, nama ki otci pameritamok ocamec aniheriw ickoteriw. Aric ma, kaki totakik, ki maninamokw wikasimiwaw, osam e kiciterik.
​
Tato kaki pekiwewakopanen, peikw iriniw, wiwa acitc onitcanica ki tacikewakopan neta matanak, taci kaki ici takocikoreparinik. Tato kickwa, amotciwekopan ko e kotci nta nantowapatak aniheriw ickoteriw.
Kek peikwaw, ki kiskeritam kitci wariketc. Ki maninam aniheriw mirapakoniw, nac asiniwa e miskohowatc, aci neta pitoc.
​
Ani apitc, nama maci kiskeritakonokopan piwapiskw ka itwaniwok. Oskan irapatcitcikan kekotc asini irapatcitcikan tepirak takonokopan. Asiniwa tca e totowakopanen e wariketc neta kotak asinik, wapatamokopan e paskareparinik tatow e otamowatc anihi asiniwa.
​
“Aci tca…” iteritamokopan meka.
​
Tecikotc meka matcakopan, e tca nta witamowatc kotakihi iriniwa kaki ici miskak. Tekaci nama awik wi tapwetowakopan. Peikw tepirak neta etaciritci ki cakosimekopan, kitci pe nta kanawapatamiritci kaki ici miskamokopanen. Mitcetowaw meka kotcitakopan, e paskarepowatc anihi asiniwa, picicikw tca wirata paskarepowakopan. Nac e ki paskarerikopanen pacteatikociriw, pecotcik ko nte e itinomokopanen aniheriw mictikoriw taci e ici paskareparinik.
​
Ekotcani ka takok ickote, kaskina awik ki iti mirowapatcitaw. Aniki tca iriniwok, e itikitiwakopanen, nama kaskeritakosiwok apitc kaki iti apicicitcik.
Seni Newashish kaki atisoketc,
Claude Flamand ki itectamakew - Dollard Dubé
Gilles Ottawa kaki nehiromoctatc,
Ka Wasikototc Pisimw 2005