1921 nac 1930

Ani apitc 1924 ka tato piponikak, ki atci okimakaniwon, Seni Newashish ki pitakew.  Otawia, Nrowi Newashish ki tapickowew. Wapikon pisimw 1928, ekoni ka iti ocitakaniwok nictam kiskinohomatokamikw, 4 kekotc 5 pisimwa tepirak pitakewakopan awacak, otehimin pisimw nac wiec namekosi pisimw.  Ka ki kiskinohamowakaniwitcik, kitci emitikoci tapwatciketc acitc kitci masinahiketcik, kitci akitasotcik. Kitcitaw atisokaniw kirika e kitikaniwonik mitcimiriw ki ici kiskinohamowakaniwiwok, erowek pitoc ki iti icinakoniw opimatisiwiniwaw. Tepirak tca ki niciwok nictam ota ka ki pe nta kiskinohomaketcik iskwewok, peikw neta, 1929 ka tato piponikarik ka takocinokopanen, 22 tato pipona ki tacikew.  132 wiec tacinaniwonokopan ota Manawan, kiskinohomakanak tca e taciwakopanen, 35 askowi kaie 80. Coria ka pikitik, kotak kekocica ki noteparino, mitowi otamirowin, kiapatc tca ki nokoon akosiwin e takok ota, ka kisisowapinaniwok kaie opaninak ka ki akosinaniwok, mitcet kiapatc iriniwok ki tcakipinewok ani apitc, e matce irakaniwitcik ka akositcik, micta mitceto pipona nama petakaniwan tan e ititcik, nama witcihakaniwiwakopan kekotc ma osam pwacta witcihakaniwiwakopan. Mitcim kaie ki noteparin Kitci atawe irinik, ani apitc.  Ka okimakaniwok, Sepier Etcakwan ki pitakew ani apitc 1930.