1941 nac 1950
1942 ka matce ocitakaniwok kotak aiamihemikiwam, 1943 tca ki kictakaniwon. Ekoni apitc kaie ka cowerimakaniwitc David Kawiasiketc ka ki icinikasotc, 100 tato piponesipan ani apitc. Enko ka ki mawtci kiceatisitc, kekat 102 tato piponesiw ka ponimatisitc, ohwe pitci pipon pisimwa 7, 1944 ka tato piponikarik. Ani apitc, awik e mahapotciketc, ici kicikowakaniwikopan 4,00$ peiko kickwa. Minawatc e nicto okimawitcik ote Manawan, Opitcion kaie Wemotaci, ki icawok nete Otawak otirinimiwawaw otci, kitci cowatc icinakonik opimatisiwiniw. 1948 ka ickwa tekaci pe nasipecimotatc mictikoke iriniw meskanariw ote itekera 17 tipahikanik, meckotcickawok mekatewokorewok, 5 pipona ki tacikew anahwe Meilleur ka ki tapickawatc Guinard. 1949 nac 1952 wiec ka tat cota tackipotcikan, irapatcitcikaniw kata ocitawok Manawani iriniwok mitowi osapwakanatikwa kaie ickwatema, atita kaie kata matce tacahikatewa kotakik nehirowisi otenak e iciticahikateki. Mitcet kaie mikiwama ki tcimatakaniwono ota otenak ani apitc. Ka ickwa orapitcikatek kitci takok ohwe oteno, ki takwaw e atoskaniwok, nama kinec ki otci icawok iriniwok notcimik, kakone pisimw nac pitci pipon pisimw matcawakopan, aric ma e ickwa aramikotatonaniwonik kiapatc nta atoskewakopan. Nama orina wiskat ki otci icawok nehirowisiwok mami otenak, e otami atosketcik, kitci ki acamawasotcik. E ki kaie sakiskiticohakaniwitcik, kice-okimawa ki pe masinahikerikopan. Kiskinohomakewiniw acitc kitikan askiriw kirika awesisa kici awoketcik ki itactakowok kice okimawa nehirowisiwok, tepirak kitci ponikakik otaskiwaw. « E iti takwakinik, aci e acterik kitci ponikakik otaskiwaw. « E iti takwakinik, aci e acterik kitci nta atosketcik, nama ki miro naktatewok otawokaniwawow, kata meka acamakaniwiwok arimatc » itewakopan iriniwok.
Ki otamirohok neta Atikamekw Nehirowisiwok.
Ki otamirohok neta Atikamekw Nehirowisiwok.
1951 nac 1960
1951 ka pitaketc mekatewokorew ocki omikiwamik, kiapatc nokoniw aniheriw omikiwam anotc, ekoni apitc ka matce atoskectowatc Sosan Tcipekwe mekatewokorewa, nac tca anotc kiapatc askowi e witcihatc. 1952 ocitakaniwon kaie kotak ocki kiskinohamatokamikw, ka ki nictam atamitakikatek. Ekoni apitc kiapatc ka meckotcickatcik mekatewokorewok, Houle tca ki icinikaso ka ki ocki takocik, aiamihemikiwamik otamironaniwon kaie akotakan ka actakaniwok. 1953 wiec ka takocicimok meskanaw nete Etcipanik itekera, mia ka nipowitcik Wisaketcakw kaie Sosan. Peikw kaie awacic neta ki taci nitawikiw, ani apitc 1954, nokosiwakopan kirika nehirowisiwok mamik e nta aiamihatcik, kaskina wiec ki ototewok ota Kanata askik. Mitcet mictikoke iriniwok ki pe nokosiwok, ani appitc 1956, ota waska Manawan, wirata tca ki pe otamirohewok iriniwa. 1957 ekoni nictam ka nipa arameskaniwok e nipa aiamihaniwok. 1958, Léon Flamand ka matce atoskectawatc kitci atawe iriniwa, nac asko 1987, masinactetcitcikan kaie ki ocitakaniwon ani apitc, Samuel De Champlain kitci atisokasotc, 24 wikwas tcimana ki otapinikatepana, kitci ki mia itatisokemakak anihwe masinactetcitcikan. Ka iti nipa aiamihaniwok 1958, ekoni apitc ka cenikatek ocki metowekamikw, ki niminaniwon akie ki taci masinactetcitcikaniwon neta mitcetwaw. Ka iti sikok. 1959, ekoni ka tipatcimonaniwok, coria kitci pakitinikatek, kiskinohamatokamikwa otci. Kenositc pisimw 1960, atamerimakaniwok Manawan iriniwok, osam warawik kaie osam mictahi e ki manikohwatcik mictikwa. Mitcetwaw ki acite masinahamatowok aniki mictikoke iriniwok kaie okima arotakan acitc ka tiperitak ota Manawan, nac e ki iti itetcik, matci kitci ki maninaritci mictikowa tan e icinakosiritci. Ki wectakaniwonokopan anihwe, mekwatc ka tacikatek Manawan otenaw kitci ki takok 1906 ka tato piponikak, itewakopan. Kakone pisimw 1960 ekoni ka cenikatek anihwe ocki kiskinohomatokamikw, mekatewokoretc ke ici taciketc acitc aiamihemikiwam ki ocitakaniwon kirika e iti rikitakaniwok. Ekoni kaie apitc nictam ka matcatcik Manawani awacak, 17 ki taciwok, ickwecak kirika ockinikicicak, e nta kiskinohamowakaniwitcik nete pecotcik Pikogan otenak. Aci kaie arimomakaniwakopan nehirowisiwok kitci matci kaie wirawaw okimaketcik kecpin e okimakeritci ka wapisiritci iriniwa ota Kanata askik.
Ka pe nipinik kirika ka iti takwakik 1960, takocinok omisimawok, pe nta kiskerimakiniwiwok ickwecak matci kitci kaie wirawaw omisimawitcik. E ki pe okimakaniwok, ocki kiapatc ki pitakew, Pierre Ottawa kaie wir otawia pe tapickowakopan.