1981 nac 1990

1982 ka atisokatcikatek Nehoriwisi aski, Conseil Attikamek-Montagnais ki apitcitaw e mikowasamatc kice okimawa irikik e ici tiperitamokwen, ekoni ka iti micta arimotcikatek aski, ka natapictawakaniwitcik aniki nico kice okimawok.  1986 nictam ka miwirakaniwitcik akosikanak nac asko nete Joliette, nehirowisiw neta ki arakaniwiw, nictam ka wapisitc iriniw miwirepan anihi ka akosiritci.  Ocki mackiki irinikwecikiwam kaie cenikatew ani apitc.  1 200 tacinaniwon ota Manawan, 125 mikiwama tatino, acitc 250 tato otenwesinaniwon ani apitc ka tato piponikak 1987.  Jean-Pierre Moar ocki okimawiw ani apitc, arimotcikatew kaie kitci rikitakaniwokipan Manawan oteno, notcimik kaie ici kanawapatcikatew kitci otatcihitisonaniwak, 13 taciwok nehirowisi kiskinohomake iriniwok, 10 taciwok ka wapisitcik ka kiskinohomaketcik, ani apitc 1987.  Kotcitakaniwon kaie  kitci kanawerimakaniwitcik awacak, nac kitci kictatcik kaskina ota ka ici kiskinohamasonaniwak Secondaire ka itwaniwok. Otehimin pisimw 1987, masinohotisonaniwon nete Opitciwonok kirika onimiski ickoteapike iriniw kitci tca mapiketik anihwe Atikamekw askik.  Ekoni ka iti icatcik nictam Manawani awacak akamikitcikamik.  Nico manactakana ki itanowok.  Nictam kaie ka iti ocitakaniwoki mikiwama okitatawak, ekoni apitc 1988, ki micta arimotcikatew kaie nehirowisi pimatisiwin ani apitc, Parak ki icaniwonopan e kotci nta miskatek ke ki totcikatekipan kwisk kitci icinakok aci Atikamekw pimatisiwin, wawatc okimawinak kaie anihe ki arimotcikatepan.  Aka orina e ki otci mirotakonik kice okimawok ka wi ici kiwe miratcik Atikamekw, mekwatc e natapictawakaniwitcik kaie  ki kipaskohikewok Manawan iriniwok nete meskanak ani apitc wapikon pisimw 1988, ki mitcetipanak ka ki kapecitcik neta, mitceto kicikwa awacamec 500 ki taciwok.  Ka pe okimakaniwok ohwe kenositc pisimw 1989, Henri Ottawa kiapatc ki koski pitakepan.  Ki iti mitceno kaie kotakihi kekocica ka ki pe tcimatakaniwoki ota otenak, mitowi nictam ka ki cenikatek, ani apitc wapikon pisimw 1989, notcinanikamikw Konik ka ki icinikatek. Kenositc pisimw 1990, cenikatew kotak ocki masinahikewokamikw.  Otatakon pisimw ka iti akotcik 1990, ekoni ka tcimatakaniwok Mamo Atoskewin Atikamekw ka ki itwaniwok, nictam ka ki pe tiperitakik neta Gilles Ottawa kaie wir ki apiw.  Magasin Manawan ki cenikatew kakone pisimw 27, 1990.  Ka iti pitci pipok aci tarewok Manawan iriniwok ke omackiki irinikwecimitcik, Francine Moar aci ka kictatc ani e ki ici kiskinohamasotc.