top of page
manawantitre-01.png

1991 nac 1996

Ohwe ke iti nikotwaso piponikak, mitceno ke iti nokoki kekocica ke oractakaniwoki kaie ke iti takoki.  Ocki metowewokamikw takon, ani apitc pitci pipon pisimw  13, 1991.  Akosi otapan kaie ki iti takon.  Ka iti miroskamik wapikon pisimw 24, 1991, kimocomino Cesar Newashish cowerimakaniwiw.  Ki actakaniwon kaie kipaskohikan meskanak, ani apitc kakone pisimw nac namekosi pisimw 1991, Attikamekw-Iriniw e wi tipatatak e icinakonik opimatisiwin.  Mikiwam kaie ki cenikatew, ani apitc kenositc pisimw, kitotakana otci.  Maison des Communications VINCENT-OTTAWA ka ki icinikatcikatek.  Kirowe kitci miro kiskeritakositc Atikamekw Irinniw, otehimin pisimw nac mikomini pisimw 1992, ki mickaw otenamiwak e otci matcehotc nac nete tekaci mamik otaskik, Metaperotin ka icinikatcikatek. Atikamekw okimawok tca kaie wirawaw ki mickapanak, enko aniki Henri Ottawa, Simon Awashish kaie Marcel Boivin.  Kakone pisimw 1992, ka tcimatakaniwok kaie otamirowin MIKISIW ka itwaniwok, iskwewok kaie iriniwok neta apiwok e nanakatcitatcik kitci kwiskw isparinik pimatisiwinik itekera ka iti pitci pipok 1992, ki micta arimitakosinaniwon kaie ota Manawan, ki icinikatamok aniheriw otamirowiniw Ka Nanto Kaskeritakositcik Nehirowisiwok Kanata Askik, kiapatc neta e nicto okimawitcik ki tipatcimowok Atikamekok.  Kenositc pisimw, 1993, ka okimakaniwok, Andrée Quitish pitakew kitci okimawitc. Atikamekw-Sipi kata mirakaniwiw kitci miwitatc kitci masinahikaniw, kice okimawok ka natapictawakaniwitcik, ani apitc kakone pisimw 1993.  Ka iti sikok, ka wasokototc pisimw 1994.  Manawan okimaw aci otapinam wircike tipirowe kitci mikak akosiwinik itekera ka atoskectakaniwok.  Ekoni apitc kaie ka tipatcimotc Cesar Newashish askiriw otci, ka wasikototc pisimw 17,

 

 

 

 

 

 

 

 

 

 

 

 

1994. Otehimin pisimw 1994, Atikamekw Iriniw ka ppikitanak okitci omasinahikan ka natapictawatc nico kice okimawa. Nama kata onikatakaniwok awacak, cenikateriw mikiwamiriw ota Manawan, wirawaw otci, Mikomini pisimw, Opitciwonok ka pitaketcik okimawok. Ernest Ottawa ki okimakatakaniwiw, kitci okimaw itakaniwiw kaskina Atikamekw iriniwa otci.  Opictikweak kice okimaw pakitinam wirctam omasinahikan Atikamekw kaie Montagnais iriniwa otci, ekoni apitc pitci pipon pisimw 1994, nama kiapatc kata ici nahitakoniw itewok okimawok e ki tipatcimotcik nete Moriak ohwe ka iti akotcik akokatcic pisimw 1995, Henri Ottawa ki pitakew kitci okimawitc. Metowewiniw ka apitcitatcik e tipatcimoctakik kekociciriw aka orina ka wi miroparinik. MIKISIW ki icinikatamok, ekoni kaie apitc ka tcimatakaniwok anihwe, kenositc pisimw 1995. Mikomini pisimw 1995, Wemotacik ka tcimatakaniwok ka icinikatcikatek Nehirowisi Kitci Atisokan, niciwok neta Manawan iriniwok ka apitcik.  Mikomini pisimw nac otatakon pisimw ki pa kiwoterakaniwok ka kiceatisitcik ote itekera omami iriniskak.  Namekosi pisimw 1995 ka cenikatek nictam Atikamekw kweckwenapewkamikw, nac ki iti cenikatew kotak kekocic Resto Elisabeth ka itwaniwok.  Pitci pipon pisimw 1995, Manawan kiapatc takoniw okicteritamowin, aci tarew kotakihi osima e ki kackitaritci kaskina okiskinohomasowiniw, Annette Dubé, ki kackiho kitci kiskinohomatokamikok e ki icatc nete Chicoutimi (UQAC), baccalaureat ki mirakaniwiw kitci matci kiskinohamaketc Etudes Françaises ka itwaniwok.  Kenositc pisimw 1996, kotak ocki mekatewokorew takocin, Couture p enta tapickwakaniwiw, Jacques Laliberté icinikaso anahwe ocki ke taciketc ota Manawan.  Nikikw pisimw 12, 1996 kice okimaw ka tipatcimotc aka e tarikwena nehirowisiwa Atikamekw kaie Montagnais ka ici iriniwiritci.  Mitcet ka wapisitcik kaie nehirowisiwok ki kockomakaniwiwok ani e iteritci. Wipatc tca ki tipatcimowok wirata Atikamekw okimawok kirika e ki nakickawatcik anihi kitci kice okima arotakan Chevrette.  Kata minotitakaniwon kaskina wiec ka ki ici matceparik kaie kiapatc kitci otamirotakaniwok, aka moci e ickwaparik itewok atikamekw okimawok.

Gilles Ottawa
Ka wasokototc pisimw 30, 1996 (ek)

Manawan 1991 nac 1996
Série_17_-_CAM-Assermentation_15082006_

To play, press and hold the enter key. To stop, release the enter key.

press to zoom
press to zoom
press to zoom
press to zoom
press to zoom
press to zoom
press to zoom
press to zoom
press to zoom
press to zoom
press to zoom
press to zoom
press to zoom
press to zoom
press to zoom
press to zoom
bottom of page